Het Oversticht
Het Oversticht in Zwolle besteet al 100 joar. Ne eerbiedwaardige organisatie van allemoal deskundigen dee adviseert oawer oonze leaf-umgeving. Wil de gemeente met ne stroate of buurte gangs, dan wordt vake advies evroagd van Het Oversticht. Dee hebt verstaand van historische bebouwing en ze weet precies wat historische huze weard zeent. Vake is der nen vasten “stadsbouwmeaster” an-esteeld den ’t de gemeente adviseert: dit hoes kan vot en det hoes mut bliewn stoan.
A-j een website van Het Oversticht bekiekt, wordt ‘t oe heelmoals woarm um ’t harte. Ik leaze doar weardige dinge oawer de leefomgeving. Doar maakt ze zik drok vuur met alle andacht vuur het verleden, de tied van non en de kommende tied. Ze zeukt aaltied de meuiste oplössingn, zegt ze. Iej köant ’t hoaste nit geleuwn. Zol een Oversticht-stadsbouwmeaster ook advies oet-ebrach hebm oawer Hotel Tiejhuis in Riessen indertied biej ’t station en het oale notoariskantoor in ’n Hoar-eande det reukeloos vot wes? Kan ‘t wean det de stadsbouwmeaster nét op vekaansie wes toen de gemeente de sloopvergunningen ofgaf?
Óf miskien mag de stadsbouwmeaster glad nit adviseern oawer paanden dee ‘t nieje plannen in de weg stoat. Nét as de Erfgoedadvieskamer Riessen-Hoolten, want dee zengt ook aaltied det ze allene mear mangt adviseren oawer paanden woermet ze Burgemeaster en Wethoolders nit vuur de veute mangt lopen.
Of miskien hef Het Oversticht een aander begrip oawer wat weardevol is? Een oold gebouw met ’n energielabel deep oonder de Z? Of miskien schakelt ze het geveul vuur de umgewings effen oet? Det zol zo mear können, want a-j in Zwolle wont of Oldemark kan’k good begriepn da-j weanig geveul hebt biej stroaten in Riessen.
At ’t allemoal écht woar is wat op een website van Het Oversticht steet, dan zolle viej met een gerust harte könn goan sloapen. Dan hove viej oons in Riessen zélfs gin zorgen te maakn oawer det mooie klassieke paand van Slaghekke in de Rozengaarde. Det zit nog achter een oerlellijken glasgewel van dee löagstoande stoffenzaak. Mear het paand is ontwörpen duur architect Kuypers van de Dionysiuskoarke en de Sint Bavo in Haarlem. Zon mooi klassiek hoes zol heel good passen in de nieje Rozengaarde teegn-oawer Spekhorst.
Ik wol al dee mooie verhalen van een Oversticht-website bewoaren en kopiëren, mear dét wol nit. Doar zit ne beveiliging op. Zo kan der dus gin meanske een boer met op met dee mooie verhalen. Zollen ze det expres doon? Umdat al dee mooie verhalen ook gewoon te mooi zeent um woar te maken…?
TEKST: Gerrit Dannenberg