Vot is vot
Het nieje fietspad in Riessen van een Schoapendiek noar de Moarkeloseweg geet dwars duur een stukke bos. A’j in zonnen bos wat weelt, mu’j eerst oonderzeuken wat ’t noadeel is vuur beume, deers en plaanten. Bureau Roelofs oet ’n Ham maakn doar een dik rapport van. Wát zit ‘r fealijk in den bos? Det geet van liester tot vlearmoes, van tak-ekel tot bosmoes en van rossig fonteinkroed tot vaalsken melkboleet en grofgestreepte glemslakken. Iej deankt det ‘t bak is? Least het rapport. Alle deers en plaanten stoat der in.
Zeunig wean op de natuur is logisch. Mear der is ’n vuurdeel: á’j oe met de natuur vergaloppeert, hersteelt het zik vake ook wier, zéker a’j ‘t een betje helpt. Noa een poar joar is de natuur wier terugge. Doar he-w vuurbeelden van: ooievaars, kikkers, klemmerds en fazaanten he’w non wier te ballas. En tóch löt de gemeente dikke oonderzeuksrapporten schriewen en doert het vake joaren vuur der écht wat gebuurt a’j in de natuur gangs weelt.
Heel aanders doo’w in Riessen met oale gebouwen. Gín dikke rapporten vuur ’t ze teegn de vlakte goat. En det terwiel de gevolgen van sloopn onherstelboar zeent. Brek iej paanden of dee der al mear dan 100 joar stoat, dan veraandert oons blikveeld, het anzeen van ne stroate wordt vuur aaltied aanders. Kiekt noar de Westerstroate. Een klassiek huuske is op-eofferd vuur 6 parkeerplaatsen. ’t Anzeen van de Westerstroate is vuurgood bedörven, want één zon sloophoes maakt nog mear verkeerde krachen lös in zonne buurte. Want wat ’n eenn mag ofbrekken, mag ’n aander jums ook.
Ik hoppe toch earlke det het nieje College van B en W nieje wetten dörft te maken vuur monumentale paanden. Det is neurig, want as oale paanden nón in de weg stoat, dan wordt ‘r dreks esloopt. Zoonder dikke rapporten oawer de gevolgen. Ik kenne det verdretige riegelijk oet ‘t ’n kop: ’t Oale Gemeentehoes, ’t Oale Hotel Tiejhuis, ’t Engelse Woark, ’t Paand van Klensman, ‘t Oalde Notoarishoes in ’n Hoar-Eane. En nog heel eawen wochen: ‘t oale café Beumer (Lamping & Luyten) an de Zaagkoele steet ‘r nit lange mear. Net zo min as bakker Render en ’t Meajke.
De natuur kan zik nog herstellen. Mear a’j buurten ofbrekt, keump ‘t nooit wier good.
Vot = vot!
Gerrit Dannenberg