Draank
Draank
Hoesdokter Koos van der Burgh zea ooit: “Iemand van de krant moet nooit drinken op gemeentelijke recepties.” En doar zit wat in. Leu met nen borrel op, zengt teegn journalisten de meest oongelukkige dinge. Nit allene in Riessen. Ook in ’n Haag. Of ze gedreagt zich ampart. Ze gooit in Brussel asbäkke duur de roeten.
At een beweendspersoon of gezagsdreager met draank op wordt an-eheuldn, dan krig det in de media breed andacht. Mear tot vuur kort stapten hoaste alleman achter ’t steur met een stuk wat borrels in ’n kraagn. En nóg: mangs fiets ik langs hele gezellige lokaliteiten met grote auto’s vuur de dure. ’s Aandersmoarns zeent alle auto’s vot en ’t preuflokaal löag. Gin mens hef nen taxi loatn kommen. Mear jea, a’j ne dikke bekuring makkelijk köant betaaln, woerumme zo’j dan nen taxi nemmen?
Ik zir nit principieel teegn draank. Mear tied en moate zeent belangriek. Iej köant ook gewoon niks nemmen. Mear a’j op ne gemeentelijke receptie roondloopt met een glas spa rood, goat z’oe oet de weg. Dan zi-j jums spelbrekker. Alleman neamp wat en iej nit. Woerumme zol’e det doon? Ik har ooit bedach: een groot wienglas met rivella en spa blaauw. Dét zut ‘r oet as “droge witte” en iederene dut wier normaal. Wal extra vervelend at ‘r dan leu zeent dee ’t alcoholslot der of hebt. En a’j zelf alcoholvriej dreenkt, is det juust extra oargerlijk.
Ik veende ’t ne hele goo zaak det roadsleden met mekoar eawen gezellig doot, noa ne roadsvergadering of ne commissie. Vroger wa’k doar jeugdig fanatiek op teegn. Dreenken op kösten van de gemeenskop… Mear ik zee det toch aanders. Doo’j oew roadswoark serieus, dan kost ’t minstens 20 uur in de wekke. Wil iej geeld verdenen, dan kö’j better 20 uur hen beunhazen goan. Dus den borrel noa de vergadering brech der de deurte nit an. Én het brech wat aanders op: de roadsleden sprekt mekoar, boeten zicht van de camera’s, as gewone leu oonder mekoar. Ne hele vruchtboare sfeer um mekoar écht te zeggen wa’j van mekoar veendt. Ik wee zeker det dit de polletiek good dut: reknge hoolden met mekoar. Dét is democratie.
En den van de kraante mut noa de vergadering metdreenken of dreks op ’t hoes op-an.
Gerrit Dannenberg