Excellent
Vanwekke zag ik an een schoolhekke ’n bröd hangen met: Excellente School. Ik zol miene wichter doar dus nooit hen doon. Wee zichzelf zónne veare in de koonte stek, hef gin kloten begreppen van ’t leaven, van de leu en van good oonderwies. Zonne schole is blieven stekken in de tied van het steampelke-van-de-juffrouw in ’t schrifje.
Hoe oerstom kö’j wean? Want wat is ne goo schole? Ne schole met 98 proceant geslaagden? Want zukke scholen kriegnt de earvolle vermeelding “excellent”. En de schole met 70 proceant geslaagden blif nergens. Mear miskien hef dee schole juust wal de mood um leerlingen met te weainig peunten gewoon te loaten zakken. Óók as de va of moo advecoat is. Miskien zit dee schole met heel völle boetenlaandse leerlingen tóch nog op een slagingspercentage van 70 proceant. Eagenlijk is dát ne échte excellente schole. Mear doar goat dee eareliestjes nooit oaver.
Doarbiej, oew slagingspercentage kan dit joar hoge wean, mear krig oewen topdoceant Engels roond de hoarfstvekaansie nen burn-out, dan lig ’t nöst alwier oonder ’n boom. A’j dán met völle keunstgrepen een eaindstreep haalt, kom iej in de ratings tóch nit vuur. Mear juust dán zi’j fealijk ne echte excellente schole.
En burn-outs hebt de leraren van tegenswoordig te ballast. Is ook gin woonder. ’n Dichter Levi Weemoedt zea indertied: “Ik ben eruit gestapt, want ik schreef iets op het bord en als ik me omdraaide, was er weer iets veranderd.” Um een haverklap mutten oonze learkrachten geestdodende noascholingscursussen volgen um het oonderwies te verbettern. Dee cursussen wordt geven duur ex-leraren dee zelf gin orde konn hoolden. Dan mear betaald in de roondte ouwehoeren, vette facturen oetschrieven en nóg körtere cursusjoaren maken as de learkrachten. Ze begint nog later dan de scholen. Want in de eerste wekken noa de zommervekaansie kö’j det volk nog neet in de schole hebben. Ze scheait ‘r minstens ne moand earder oet, want dan zeent de scholen drok met de examens en het ofroonden van het schooljoar.
En de beste oplössing vuur hoaste alle problemen geef ik hier zo mear gratis: maakt klassen met 15 leerlingen en neet mear. De jeugd van teegnswoordig is jums völle moondiger en beweaglijker as 30 joar terugge. En de oolders ook; dee kuijert froai met oaver alns in de scholen. Dan he’j an 15 leerlingen de haande mear as vol. Doot al dee tiedvrettende noascholingscursussen der achterhen. Dan hool iej nen hoop tied oaver um gewoon oew oonderwieswoark te doon. Excellent woark.
TEKST: GERRIT DANNENBERG