Woarheaidsciefers
Der goat mear leu dood in berre as in ‘t vliegtuig. Woarheaid as ne koo. Doar dachen ik an op de BHV-herhalingscursus biej ’t OCT. Alleman mu-w learen re-animeern. Rechtevoort geet det met slim geavanceerde oefenpoppen woerop ze precies köant ofleazen o’j de böste nit te depe indrukt, 30 keer achter mekoar poompt en o-j nit te völle loch in ’t slachtoffer poest. De apparatuur teelt dat allemoal op en dan zegnt z’oe wat een oaverleavingskaans van ’t slachtoffer is. Ik zatte op 99 proceant. De’s een mooi ciefer netuurlijk…mear dan mu-j wál in actie kommen at ‘r ene ne hartanval krig. En dee actiebereaidheiad registreert het apparaat nit. Doarumme vertelt zukke getallen mear een klean stukn van de echte woarheaid.
A’j ne hartanval kriengt boeten het zeeknhoes, is de oaverleawingskaans duur re-animeren grötter as ín het zeeknhoes. De enthousiaste instructrice zea: “Waar dat aan ligt, kunnen we nog géén finger achter krijgen.” Mer iej hooft volgens miej ginnen Maurice de Hond te wean um te zeggen det in een zeeknhoes vuural zeeke leu ligt dee ook aandere dinge mangelt.
Frans Timmermans was as een wich zo bliej det 88 proceant van de Groen Links PvdA-achterban vuurstaander is van de fusie. Mer van alle PvdA-leden hef 57 proceant estemd en van dee 57 proceant was 51 proceant vuurstaander van de fusie met Groen Links. Dus fealijk hef iets mear as de helfte stemd en van dee helfte is de helfte vuur de fusie…!? Dan kan Timmermans wal zegn “bijna Noord-Koreaanse getallen”, mear dan sjoemelt hee nét zo hard met de ciefers as ze in Noord-Korea doot.
Biej de SGP in Riessen is discussieerd oawer vrouwleu op de verkiezingslieste. De SGP hef in Riessen roem 1000 leden. Op dee bewuste vergadering warren 66 kearls en doarvan was een groot deel teegn. Vuural de echte hardliners hadden de möaite nömmen um op de vergadering te kommen. Mear wat dee aandere leden deankt, weet wiej nit, want ze warren der gewoon nit. Kö’j wal zeggen: een groot deel van dee vergadering wes teegn. Mear dee ciefers vertelt oe fealijk niks.
Ciefers liekt exact, mear der heurt aaltied een verhaal biej. Nit allene statistieken mu-j met nen grootn körrel zoolt nemmen, mear álle ciefers. Of ’t geet um de oawerleawingskaans van 99 preceant as ik oe re-animere of um de Noord-Koreaanse instemmingsciefers vuur de fusie van GL en de PvdA. Jammer van ne mooie club as de PvdA.