Doondern en löchen
Geregeld krieg ik de vroage: heb iej nen bloodhekel an de Erfgoedadvieskamer van Riessen-Hoolten. Loa’k dreks duudlijk wean: absoluut nit! Um dissen Monumentenroad te kriegen was écht een gebed zoonder eande. In 2015 was ’t eindelijk zo vear. Een naam is later veraanderd in Erfgoedadvieskamer, mear de functie is precies hetzelfde: gevroagd en ongevroagd advies gewen oawer historische huze en stroaten.
Der zit hele sympathieke, bekwoame leu in: Arie Nijkamp - projectleaider biej Nijhuis Bouw, Ewoud van Arkel - oetgewer en buurtcontactpersoon van de Twentse Ervenstichting, Anthony van der Wulp - roadsgriffier van Nijverdal-Heldern en nog een poar oold-ambtenaren. Deskundigheaid genog. Gevroagd advies gewen, dat is gewoon ofwochen tót Börgemeaster en Wethoolders oe wat vroagt. Dat is nit zo meuilijk. Óngevroagd advies gewen is zélf op pad goan, oe royaal loaten informeern, biej ne stadswaandeling good lustern noar ‘n stadsgids. Het fototoestel in ’n anslag en biej het vroogere wonhoes van Belcampo in de Grotestroate dreks nen foto maken en dreks noadeanken hoe-j dát klassieke gebouw köant redden.
De start van de Erfgoedadvieskamer in 2015 was fealijk al twiefelachtig. Ze warren nit wakker en dat nota bene noa het ofbrekken van ‘t oale stadhoes op ’n Skeeld, Hotel Tijhuis biej ’t station, een spölgoodweenkel van Klensman in de Grotestroate en ’t oale notoarishoes in ’n Hoar-eande. Een Engelsen villa van menear Tim Ter Hörst an de Wierdenseweg was zoonder oarg vot. Het College van B en W har ze jums nit um advies evroagn.
En dan zin’k precies biej min grötste bezwoar. In een woarkopdracht van dissen adviesroad steet dat ze ook óngevroagd advies munn gewen. Ook al was een Engelsen villa van menear Tim in 2015 nit te redden: ze hadden der wat van munn zeggen. Dát zol een heel good begin wean ewes. Mear viej zeent 10 joar vearder en het grote ofbrekken is gewoon verdan egoan en monumentale gebouwen, stroaten en buurten zeent in Riessen nog aaltied vogelvriej. Joa, de joarlijkse Erfgoedpluim oaverhandigen an leu dee ’t toch al op ’n goodn weg zeent is nit zonnen grote keunst. Wal fijn um met in de kraante te kommen netuurlijk. Mear det kan ik ook wal. Mer adviseren watvukke stroatbeelden behoolden munn bliewen, watvukke huze ’t weard zeent um in de bene te hoolden, watvonnen koper of huurder doar biej past én doar wat vuur oawer hebben. Dát is de keunst.
De Erfgoedadvieskamer mut het loaten doondern en löchen at ‘r weardevolle gebouwen of stadsgezichten in ’t spel zeent. Lustern noar de leu! Foto’s maken en adviseren um dinge nooit eerst of te brekken. Want wat vot is, keump nooit wier terugge. Siepeltroanen achterof koop iej niks vuur. As de Erfgoedadvieskamer zichzelf doar nit vuur oaver hef, dan kan dit adviesorgaan inderdaad better opstappen. Hoe geane ik ze as meanske ook magge liedn en het roeme vacatiegeeld van harte gunne.
TEKST: GERRIT DANNENBERG
Gerrit Dannenberg